Die koffie
winkel is my skryfplek. Dis asof ek hier meer uitgerig kry as by my huis. Elke
oggend voor werk, kom sit ek eers hier vir ’n uur soms twee en skryf. Ek
parkeer my bakkie by my blommewinkel, Just Flowers en stap die blok af hier na
toe. Hier skryf ek, drink koffie, hou van die mense dop en stap dan terug sodat
ek stiptelik agtuur die winkel kan oop sluit.
Ek kyk
weer na haar hande, lang slanke vingers, wat die koffiebeker vashou. Wie sy is
en wat haar naam is weet ek nie, maar al wat ek weet is dat sy iets in my
wakker maak.
Vir die
afgelope twee dae kry ek ook nie geskryf nie. Sodra sy instap is my oë en
aandag net by haar. Ek wou al na haar toe gaan en gaan kennis maak, maar dan
weerhou ek my daarvan, sy is immers getroud.
Dis haar
hele houding, haar manier van loop. Haar kop half agteroor gegooi en regop asof
sy in die weermag was.
“Waar is
die badkamer?” vra sy in ’n hees stem.
Ek trek
my asem in om haar te antwoord en draai na haar. Sy staan gebukkend langs my en
haar bloes gaap oop voor. Onbeskaamd staar ek na die rondings van haar borste .
. . ek dink my mond hang ook oop.
Sy kom
regop en glimlag vir my. “Die badkamer?” vra sy weer.
Ek kry nie
’n woord uit nie en beduie net in die rigting van die badkamer. Moes ek nou
soos ’n pervert na haar borste staar? Ek kan my self skop omdat ek so blatant
ongeskik was.
Ek sluk vinnig die laaste bietjie koffie weg. Net
toe ek wou opstaan, rus twee hande op my skouers.
“Dankie,”
fluister sy met haar hees stem in my oor.
Ek draai my
kop na haar en haar gesig is reg langs myne. Haar donker, amper swart oë, hou
myne vir ’n rukkie gevange voor sy regop kom en deur toe stap waar haar man vir
haar staan en wag.
Ek sit agter my lessenaar in die blommewinkel en
staar voor my uit.
“Oe! Die
Mies se kop is nie by die winkel nie.”
Verdwaas
kyk ek op. Ek kan my lag nie hou nie. My vier staatmakers staan vraend voor my.
“Waar’s
die Mies se kop dan nou vandag?” Marta kyk my kopskuddend aan.
Hulle is
doodreg, my kop is nie hier nie, dis nog in die koffiewinkel by daai sexy
vroumens. “Môre julle,” groet ek verleë. “Isak, jy moet asseblief hierdie
bestelling by die mark gaan afhaal,” vra ek en gooi vir hom my bakkie se
sleutels. Hy is juis so mal daaroor om met my Isuzu 4x4 rond te ry.
Ek het die winkel vyf en twintig jaar gelede saam
met Gerty, my regterhand, begin. Vir vyf jaar het ons alleen gewerk voor Isak
bygekom het. Hy werk al twintig jaar hier en het so tien jaar terug, hoed in
die hand vir sy vrou, Marta, kom werk vra. Sy is laat gaan by haar vorige werk
as gevolg van finansiële druk. Ek is nog nie een dag spyt dat sy hier is nie.
Gwyneth is
die jongste tussen ons en ook die enigste een wat opgelei is om blomme te
rangskik. Sy maak die mooiste tafel ruikers en bruidsruikers is haar forte.
Saans maak sy eers sketse voor sy ’n blom in ’n pot of ruiker kom sit.
“Isak is nog nie terug nie Nina,” lig Gwyneth my in toe
sy my kantoor binnekom.
Ek kyk op
my horlosie. “Sjoe, hy’s al ’n uur weg! Wag ek bel gou.”
Die foon
lui maar Isak antwoord nie. Marta staan ook nou nader en lyk bekommerd.
“Dalk hoor
hy nie die foon lui nie,” probeer ek hulle gerusstel en bel weer. “Isak, hemel
waar is jy?”
“Sorry
Nina, ek het drooggemaak. Ek het in ’n grênd kar se gat
vasgery”
“Ag nee,!
My bakkie!” My oë gaan vlugtig na Marta, toe sy vinnig na haar mond gryp.
“Toemaar
Nina, jou bakkie se bulbar makeer niks nie . . . maar daai BMW se gat is moer
toe.”
Ek kan nie
help om te proes vir Isak se verduideliking nie. “Ja, toe nou maar, kry die
besonderhede, ek het assuransie.” Ek sug van verligting en druk die foon dood.
“Isak is okei, net my bakkie gestamp.”
Marta los
’n paar knope van verligting.
My foon
lui en dis Isak.
“Ek kan
nie ry nie. Die man en vrou wil nie hê ek moet gaan nie!”
“Goed,
kalmeer Isak. Sê vir hulle ek is op pad. Gee my die adres.”
Ek leen Gwyneth se kar en ry vinnig na die adres wat
Isak my gegee het. Die polisie is reeds daar en ek draf na die naaste een wat
ek sien.
“Konstabel, dis my drywer en my bakkie. Ek het versekering. Ons kan mos
net besonderhede uitruil en gaan? Die blomme in die bakkie gaan verlep en as
dit nie nou in ’n yskas kom nie, ly ek skade.”
Die
polisieman knik en stap na die insittendes van die BMW. Ek kyk Isak kwaai aan,
hy trek sy skouers op en steek ’n sigaret aan.
Die
polisieman vat te lank na my sin en ek loop na die BMW toe. Halfpad steek ek in
my spore vas. Dis die vrou van die koffie winkel.
Die kwaai
uitdrukking op haar gesig versag toe sy my sien. “René,” sê sy en steek haar
hand uit na my toe.
My knieë
voel lam toe ek aan haar hand vat, dis sag en warm. Haar gesig is vlekloos en
sy lyk nou effens jonger as vanoggend by die koffie winkel. Sy troon bo my uit,
’n hele kop lengte langer as ek.
Ek stel my
self voor.
René los
my hand en praat weer met die polisieman.
Ek kyk na
haar soen bare mond en wonder hoe dit gaan voel om haar te soen. Ek skrik vir
my gedagtes toe sy weer met my praat.
“Ons sal
weer kontak . . .”
Sy kyk na
my en ek weet sy’t my naam vergeet. “Nina,” sê ek weer.
Haar man
vervies hom vir haar en pluk haar aan die arm terug kar toe.
Die volgende oggend is nie een van die twee in die
koffie winkel nie. Teleurgesteld bestel ek koffie en gaan sit by die tafel in
die hoek. Ek haal my pen en notaboek uit. My gedagtes is kort-kort by René.
Dis al drie dae sedert Isak in hulle BMW vasgery het en ek het haar nog glad nie weer gesien nie. Daardie oggend bel haar man, Hannes, my. Hy bedank my kortaf vir sy kar wat herstel is. Die skade was groot en hy moes drie dae wag.
Dis al drie dae sedert Isak in hulle BMW vasgery het en ek het haar nog glad nie weer gesien nie. Daardie oggend bel haar man, Hannes, my. Hy bedank my kortaf vir sy kar wat herstel is. Die skade was groot en hy moes drie dae wag.
Droomverlore staar ek na die foon in my hand . . . hoekom kon sy my nie
bel nie?
Ek bestel koffie en stap na die tafel waar ek altyd
sit. Daar sit reeds iemand en vies plak ek my sommer by die eerste en beste
tafel neer.
Vir tien
jaar kom drink ek hier koffie en sit ek by daardie tafel. Vir tien jaar sit
daar nooit iemand by “my tafel” nie.
“Nou hoekom sit jy daar? Ek dag jy sit hier in
die hoek?”
Ek kyk nie
dadelik op nie. Ek sluit my oë en glimlag. Haar heserige, sexy stem vul my ore
en ek is in ekstase. Dis René wat op my plek sit.
Sy loer
oor haar skouer na my en met haar wysvinger, wink sy my nader.
Ek gaan
sit by haar. “Ek het gedink ek gaan jou nooit weer sien nie.” Die woorde is uit
voor ek kon keer.
’n Glimlag
speel om haar mond. “Nou hoekom sou jy my weer wou sien?” Sy kyk my aan met
haar groot donker oë, amper swart.
’n
Begeerte om haar te wil soen oorval my en ek kyk vinnig weg. Half bewerig tel
ek my beker koffie op en vat ’n groot sluk.
“Ontmoet
my vanaand om seweuur hier vir koffie en dalk iets te ete ook.” René staan op
en maak verskoning. Sy wag nie vir my antwoord nie en verdwyn by die deur uit
na sy betaal het.
Die
klompie by die blommewinkel kan nie met my huishou nie. Ek jubel van
opgewondenheid. Kort-kort kyk ek na die horlosie. “Ons maak so bietjie vroeër
toe vandag, julle!”
“Is daar
weer love in die air dat jy wil vroeg toemaak Nina?”
“Jy ken my
te goed Gerty.” Ek lag kliphard. Die klompie skud net hulle koppe, hulle het my
lanklaas so uitbundig gesien.
Ek stop voor die koffie winkel, opgetof vir die vrou
wat my knieë so lam maak. Dis die eerste keer dat ek saans hier kom en ek
verbaas my dat Coffee Kettle so besig is. Soggens voor agt is hier maar min
mense.
René is
reeds hier en glimlag toe sy my sien. “Ek het reeds vir ons cappuccinos bestel,
hoop nie jy gee om nie?” sê sy toe ek by die tafel aankom.
“Sjoe, jy
lyk stunning.” Praat ek weer uit my beurt uit, maar die keer gee ek nie om nie.
Ek is wragtig verlief op hierdie vrou.
“Jy self
is prentjie mooi.” René betrag my vir oomblik. “Sal ons drankies iewers gaan
drink?”
Ek stem in
en ons sluk vinnig aan die cappuccinos. Sy betaal die rekening en ons stap na
buite.
Die aand
luggie is lekker koel en die een na die ander kosreuke kom aangesweef. Ek besef
nou eers hoe honger ek is.
“Ry agter
my aan . . . sal jy?”
Sy klink
geheimsinnig, maar om een of ander rede vertrou ek haar volkome.
My oë rek toe ons voor ’n vyfsterhotel stop. Kar
wagte kom vinnig nader, maak my deur oop en staan bakhand en wag vir my sleutel
om die kar te gaan parkeer. Ek glimlag verleë toe ek die sleutel aan hom
oorhandig.
Ek sluit
by René aan waar sy vir my by die voordeur wag. “Sjoe, is dit nie bietjie luuks
nie?”
“Moenie
worry nie, dis my treat,” stel sy my gerus en hak by my in.
“Mevrou
Bornmann, jou tafel is gereed,” sê die hoofkelner. Hy kyk na my en knik
formeel.
Ons volg
die kelner en ek verkyk my aan die plek. Dis luuks en verskriklik mooi hier
binne. Ek kyk rond, die eetsaal is vol mense, ek kan nie dink dat hier nog
iewers ’n tafel vir ons oop is nie.
Die
hoofkelner lei ons deur die eetsaal en kom by twee groot wit, ivoor deure tot
stilstand. Hy klop aan die deur, dit klink amper soos morse kode. Die groot
swaar deure swaai oop en hy stel ons aan ’n ander kelner voor. Die ivoor deure
swaai weer toe nadat ons binne is.
“Waarheen
gaan ons René?” fluister ek en begin bekommerd raak. Dit voel of ons ’n
ewigheid vêr loop.
Sy
antwoord my nie, vat net my hand in hare en trek my nader aan haar.
“Dames,” sê die
kelner terwyl hy die deure oopmaak. Hy wag dat ons instap en maak dit weer
agter ons toe. Ek trek my asem hoorbaar in. “Ons eie private balkon . . . Dis
asemrowend!” Stads liggies so vêr as wat die oog kan sien wat dan wegraak op die
donkerblou horison. “Hemel René, hoe weet jy van die plek? Ek het gedink so
iets bestaan net Hollywood.”
Sy lag
hardop. “Dis net vir goedgekeurde gaste en gewoonlik is dit maar iemand wat
iemand ken, wat weet van die plek.
Ek gaan
staan weer teen die balkon muur. René kom staan langs my en ek word bewus van
haar hand wat liggies aan myne raak op die muurtjie. Vir ’n oomblik wonder ek
waar haar man is, maar blok die gedagte dadelik weer uit . . . ek wil dan juis
alleen saam met haar wees.
Sy gryp my
hand vas toe ek wegdraai van die balkon en trek my nader. Dit voel of my hart
by my keel gaan uitspring. Ek begin vinniger asemhaal, maar probeer dit so
saggies moontlik doen, sy moet nie agterkom hoe ek oor haar voel nie.
“Nina?” René
kyk my aan met haar groot swart oë. “Daar is iets . . . ek is nie gay nie . .
.”
My hart krimp
in een. Sy het agtergekom hoe ek oor haar voel . . . dis hoekom sy my hiernatoe
gebring het, om vir my te kom sê dat daar nooit iets tussen ons kan wees nie. “René,
ek weet jy’s getroud en ek sal nooit tussen jou en . . .”
Haar mond
is op myne en sy forseer my lippe oop. Ek maak my oë toe, ek wou haar soen van
die eerste dag af wat ek haar gesien het.
Sy druk my
saggies weg en gaan staan weer teen die balkon muur. “Nina, ek is nie gay nie,
of so het ek gedink. Jy maak iets in my wakker. Daardie eerste keer in die
koffie winkel wou ek so graag by jou gaan sit en met jou gesels, maar elke keer
was Hannes by.” René gooi haar hande in die lug. “Ek weet nie wat gaan nou met
my aan nie,” sê sy en gaan sit by die tafel. Sy skink vir ons wyn en nooi my om
te sit.
“Ek voel
dieselfde oor jou, maar ek sal nooit tussen jou en jou man kom nie.” Ek kyk na
haar en sy lyk bekommerd. Sy antwoord my nie.
“Kom ons
bestel iets om te eet,” sê sy en druk ’n spyskaart in my hand.
Nie een van ons sê ’n woord nie. Net die gekap van
die eetgerei teen die borde word telkens gehoor. Ek kyk na René, sy lyk nie
soos vroeër vanaand nie. Daar is ’n snaakse trek om haar mond.
Sy stoot
haar bord agteruit. “Ek’s jammer Nina, maar dit kan nie. Jammer, dat ek ’n
verkeerde indruk geskep het en jou aanleiding gegee het.”
Ek laat
val my mes en vurk in die bord. René Bornmann het nou net my bubble gebars. Weg
is die misterie wat sy om haar gehad het. Ek is teleurgesteld, seergemaak,
kwaad en ek wil hier uit. “Ek wil huis toe gaan,” sukkel ek om die woorde uit
te kry.
Sy vat my
hand en alle weerstand verkrummel. Hemel, wat hét hierdie vrou dat sy my so kan
laat voel oor haar? Ek probeer nie eers my hand uit hare trek nie.
“Te hel
met Hannes!”
My oë rek,
ek verstaan nie mooi wat sy nou eintlik bedoel nie.
“Hy
behandel my nie meer met respek en liefde nie. Ek het liefde nodig. Nina, ek
het jou nodig.”
René kom
sit wydsbeen oor my. Sy verwar my en ek is nie seker wat ek veronderstel is om
te doen nie.
My lippe
word weer oop forseer, haar soene vuriger as vroeër. Haar asem jaag, myne ook.
Sy soen my in my nek, in my ore. Ek gryp haar dwalend hande vas en ruk haar tot
stilstand.
“Wat doen
jy?”
René kyk
my vraend aan. “Ek wil jou hê, met jou liefde maak. Wil jy nie?”
Ek verslap
my greep om haar hande. “Dis nie wat jy netnou wou hê nie René.”
Sy klim
van my skoot af en gaan staan by die balkon muur. “Nina, ek wil jou hê. Vergeet
asseblief alles wat ek netnou kwytgeraak het.”
René kom
staan agter my. Haar hande gly stadig voor by my bloes in. Sy streel my borste
met haar hande. Ek wil haar keer, maar ek is magteloos. Weer is ek vasgevang in
haar web.
Hannes probeer sy vrou al van agtuur af in die hande
kry. Sy vlug is gekanselleer en René moet hom gaan haal, maar haar selfoon bly
oorgaan in stempos. Elke tien minute bel hy en los boodskappe.
“Kom sit
eers ’n rukkie by my in die kar voor jy ry, asseblief,” vra René.
Ek
stribbel eers teë, maar stem tog in.
“Dankie,
vir ’n wonderlike aand Nina,” sê sy en vat my hand in hare. Haar foon lui en sy
los my hand onmiddellik. “Hannes? Wat! Ek dog jy sit amper in Engeland? Ja,
goed, ek sal nou-nou daar wees.” René kyk na haar foon en druk ’n paar
knoppies. “Ses en dertig missed calls! Hy soek my al van agtuur af!”
Sy klim
uit en stap saam met my na my bakkie toe. “Ek sal jou bel. Het nog jou nommer,
van die ongeluk af.” Sy glimlag en vou haar hande om my wange. Weer soen sy my
passievol.
René
flikker haar ligte toe sy verby my ry. Ek sit nog ’n ruk om tot verhaal te kom
voor ek koers kies huis toe.
Vir die eerste keer in tien jaar breek ek my
roetine. Ek is reguit blommewinkel toe en het dadelik oopgesluit sonder om
Coffee Kettle toe te gaan.
Marta en
die ander drie staan my oopmond en aangaap. “Nou hoe laat was Mies dan al
hier?” vra Marta kopskuddend.
Die eerste
vyf blomme bestellings is klaar en reg vir aflewering. Ek storm op Marta af en gryp
haar om die nek. “Verliefdheid maak dat mens enige iets regkry.”
“Ek kon
dit gedink het. Gister se vroeg lopery en vandag se vroeg beginnery . . . dis
net ’n vroumens daai!” gooi Gerty ook ’n stuiwer in die armbeurs.
“Ry die
persoon dalk ’n BMW met ’n nuwe gat?” vra Isak.
“Ja, toe
ou slimme, jy moet daai blomme gaan aflewer.” Ek druk strokies in sy hand en ek
sien sy gesig raak ernstig.
“Nina, ek
druk nooit my neus in mense se sake nie, maar pasop, jy gaan seerkry. Daai vrou
het ’n man en vroumense los nie sommer hulle mans vir ander vroumense nie.”
Ek glimlag
vir hom en gee hom ’n druk. “Isak, jy preek nou wraggies soos my pa sou preek.
Ek weet jy’s besorg oor my, maar ek sal versigtig wees.”
Hy knipoog
vir my voor hy by die deur uit verdwyn.
My glimlag
verdwyn toe ek in my kantoor kom. Hy laat my nou dink. Dis waar wat hy sê,
vrouens los nie hulle mans vir ander vrouens nie . . . nege-en-negentig persent
nie.
’n Week is al verby na ek en René saam by die hotel
in Centurion was. Daar’s ’n leemte in my hart en ek wonder of Isak nie tog reg
was nie. Kort-kort dink ek terug aan sy woorde.
Half elf
die aand lui my foon. Dis ’n onbekende nommer, maar toe ek daardie hees stem
hoor . . .
“Ek weet
dis laat, maar mag ek oorkom asseblief. Ek ry nou van die lughawe af. Hannes se
vlug, Engeland toe, het nou net vertrek.”
“Natuurlik! Ek kan nie wag om jou te sien nie.” Ek gee haar my adres en
kry gou die sitkamer aan die kant.
Kwart voor twaalf lui die voordeur klokkie. Sy gooi
haar arms om my nek toe ek die deur oopmaak. “Ek het so na jou verlang.” Sy
soen en druk my aanhoudend. “Ek kon jou nie eers bel nie, want Hannes is soos
’n vlieg al om my.”
My hart galop en ek voel soos daardie aand
in die hotel. Ons gaan sit saam op die bank nadat ek vir ons koffie gemaak het.
“Gaan ons
nou die hele nag hier sit?”
Ek trek
vir haar groot oë. “Jy’s voorbarig vanaand,” skerts ek en vlieg ook sommer
regop. Ek gaan staan voor René en steek my hande na haar uit.
“Uiteindelik!” Sy gryp my hande vas en trek haar self regop.
Soos ’n skaap
ter slagting, lei ek haar na my kamer. Ek gooi haar op die bed neer. “Dis mos
nou baie beter as die stoel daar by die hotel.”
Sy lag,
gryp my hand en trek my op die bed langs haar neer.
“Liewe hemel, ek het verslaap!” Is al wat ek sê toe
ek die blommewinkel oopsluit. “Gerty! Ek wil nie ’n woord hoor nie,” sê ek
vinnig toe ek hoor hoe sy haar asem intrek om iets kwyt te raak.
Hulle haal
die blomme uit die yskaste en ek staan ook nader om te help. ’n Uur en ’n half
later is die rangskikkings gedoen, die bakkie gepak en reg vir aflewering.
“Ry Isak,
dis kwart oor tien. Jy gaan dit maak.”
Pootuit
gaan sit ons almal in my kantoor.
“Nog nooit
so vinnig gerangskik en gepak nie,” laat hoor Gerty. “Maar nou ja, dit gaan
maar so in die begin Nina.”
Ek kyk
fronsend na haar. Sy antwoord my voor ek kan vra wat sy bedoel.
“Baie seks
en laat by die werk aankom.”
Gerty
koets net betyds onder die tafel in toe ek haar met een van die blomme mandjies
gooi. “Ek het gesê ek wil nie ’n woord van jou hoor nie, jou pes.”
Al laggend
staan Marta op. “Oe nee, wag! Julle praat nou van goed wat ek al lankal nie
meer doen nie. Ek gaan pak liewer blomme.”
Ons drie
kyk Marta verbaas agterna en toe sy die deur toe stoot, skater ons van die lag.
René sit op die stoep vir my en wag. Ek het haar
belowe dat ek elfuur gou ’n draai sal kom maak.
“Ek is
jammer, ek’s ’n halfuur laat.” Ek gaan sit langs haar en begin haar soen net
vir ingeval sy kwaad is. “Ons was net betyds klaar met vanoggend se bestelling,
met die wat ek verslaap het.
“Moenie so
verskonings maak nie. As jy besig is, is jy besig.” Sy trek my weer nader en
soen my. “Kan jy bly?”
Ek is soos
klei in haar hande en sy weet dit. Sy hou aan om my te soen, sy maak my
heeltemal weerloos.
Meegevoer
deur haar passie, liefde en aandag, kry sy my weer in die bed.
Ek sug. “Dis kwart oor vier, ek moet vyfuur gaan
toesluit René.”
Sy verslap
nie haar greep nie, sy druk my egter net stywer vas teen haar. “Moet jy regtig?
Dis dan nou so lekker cozy hier in die bed saam met jou.”
Ek wurm my
los en trek my klere aan, wat die vloer vol lê. “Wag net hier vir my, ek’s na
vyf weer terug.” Vinnig spring ek in my bakkie en ry terug blommewinkel toe.
“Ja, ek weet! Dis nie nodig om my so aan te gluur
nie!”
“Jy soek
vir moeilikheid Nina.”
“Ag, Isak
asseblief! Sê vir my of daar vroeë bestellings vir môre is, ek wil die winkel
sluit.”
Die vier
rek hulle oë en kyk onderlangs na mekaar. Hulle ken my nie so nie, ek skree
nooit op hulle nie en het ook nog nooit vir een van hulle ’n skewe woorde gesê
nie. Ek is altyd geduldig en gewoonlik is ek op datum met vroeë bestellings vir
die volgende oggend.
“Net die
begrafnis van ou Mister Neethling. Sy kinders wil graag die kis ruiker nege uur
môreoggend by die undertakers hê. Die begrafnis is tien uur.”
“Dankie,
Marta. Gwyneth ek sal sewe uur hier wees as jy dan so halfuur vroeër kan inkom
seblief. Dan kan Isak half nege ry om te gaan aflewer.”
Almal is
buite en een vir een groet hulle toe hulle wegstap. Gerty bly egter staan.
“Nina, ons gaan besigheid verloor as jy môre laat gaan wees.” Sy’s opreg toe sy
dit sê. Ek besef dit ook maar alte goed.
Net so voor ses stap ek my huis binne. Die reuk van
knoffel en varkboud oorweldig my toe ek die deur oop stoot.
René groet
my by die voordeur met ’n glas wyn in die hand en ’n soen op die voorkop.
“Ons
kan so sewe uur eet, dan behoort als gaar te wees.”
Ek stap
saam met haar kombuis toe. “Hmm, die kos ruik heerlik.”
Sy maak
haar glas vol wyn en skink vir my ook een. “Ek is nog net tot môreaand hier by
jou.”
Skokkend
kyk ek haar aan. “Maar jy dan gesê ons gaan vir die twee weke wat Hannes in
Engeland is, bymekaar wees!”
René vat
my glas wyn uit my hand en sit dit op die kombuistafel. Sy vou my toe in haar
arms en druk my teen haar vas. “Ek weet wat ek gesê het Nina. Hannes het gebel,
hy land Vrydagoggend en ek moet hom agtuur op die lughawe kry.” Dit lyk of daar
trane in haar oë is toe sy my gesig in haar hande neem. “Dis nie my skuld nie.”
Ons eet eers half agt daardie aand en probeer mekaar
opbeur. Na ete skink sy vir ons nog wyn, maar ek wys dit van die hand. “Ek moet
môreoggend sewe uur oopsluit. Daar’s ’n kis ruiker wat half nege afgelewer moet
word.”
“O.” sê sy
en sluk haar glas wyn met een teug weg. “Die ene sal ek dan maar kamer toe
vat.” Sy glimlag vir my en steek haar hand na my toe uit. “Ons het darem nog
vanaand en môremiddag.”
Ek voel so veilig hier waar ek in René se arms lê.
“Wanneer gaan ek jou weer kan sien as Hannes terug is?”
Sy hou my
stywer vas en verseker my dat ons mekaar gereeld sal sien, al is dit net vir
kort rukkies.
Tevrede
raak ek aan die slaap, maar René lê nog lank wakker en peins.
Op die kop sewe uur sluit ek die blommewinkel oop en
half agt stap al vier my werkers daar in. Hulle glimlag breed, bly dat ek betyds
is en dat ek al halfpad klaar is met die ruiker.
Die kis
ruiker word betyds afgelewer. Ek bly die hele dag by die winkel en die klompie
is baie bly daaroor. Hulle weet nie dat my hart binne-in my skeur nie. Ek wil
eerder vir oulaas die dag saam met René spandeer. Wanneer gaan ek haar weer
sien? Gaan ek haar ooit weer sien?
Daardie aand neem ek en René afskeid van mekaar. Ons
maak liefde asof dit die eerste keer is. Sy hou my vas en ek wens sy wil my
nooit weer laat los nie.
Skielik
spring ek regop in die bed. “Jy kan mos nog vanaand oorslaap! Of jy nou hier
vanaf ry of van julle huis af, is mos dieselfde.”
René gryp
my weer vas en stem in. Sy raak weer lank na my aan die slaap daardie nag.
Ons is vroeg op die volgende oggend en neem swaar afskeid
van mekaar. Ek sien haar af by haar kar, sy moet vroeër ry as ek, dis meer as
’n uur se ry lughawe toe. Ons soen lank en innig voor sy in haar kar klim.
Trane
stroom oor my wange toe haar kar nie meer sigbaar is nie. Terug die huis in en
gaan val op my bed neer. Ek ruik haar parfuum op die kussing en ek druk dit
styf teen my vas.
Vir ’n
halfuur bly ek so lê voor ek opstaan en gaan klaarmaak vir werk. Hoe gaan ek
oorleef op net gesteelde uurtjies of kort geselsies oor die foon?
Aanvanklik het René elke dag gebel, toe word dit al
minder. Nou bel sy gereeld een keer per week. Sy vertel hoe frustrerend dit is
om saam met Hannes te wees, hoe sy nou gril as hy aan haar vat. Gelukkig kon sy
nog elke keer ’n verskoning uitdink om hom te keer, maar sy besef maar alte
goed dat die dag nader kom wat sy haar vroulike plig teenoor haar man sal moet
nakom.
Ek kry ’n
koue rilling toe ek besef dat sy een of ander tyd sal moet ingee, hy is immers
haar man.
Daar’s ’n ligte kloppie aan my deur Donderdagoggend.
“Binne!” sê ek en sonder om my kop op te lig.
“Jy moenie
so hard werk nie.” sê ’n bekende hees stem.
“René!” Ek
spring op en omhels haar.
Sy gee my
net ’n piksoentjie en maak my vinnig stil. Sy fluister dat haar man ook hier
is.
Net betyds
tree ek weg van René, toe Hannes my kantoor binne stap.
Hy groet
en kyk my vir ’n oomblik aan. “Jy! Jy is die een wie se drywer in my vasgery
het!”
René maak
hom vinnig stil. “Ag, kom nou Hannes, dis al meer as ’n maand terug. Buitendien
is jou kar mos reggemaak man!”
“Ja, goed
dan! Het jy al vir haar gesê wat ons soek?”
René
beduie vir my die tipe rangskikkings wat sy wil hê asook die kleurskema. Dis
vir ’n funksie Vrydagaand by haar man se werk.
Hannes betaal
met sy kredietkaart en brom iets van die blomme moet nie laat wees nie.
“Stap jy
solank kar toe, ek moet net gou nog iets uitklaar.”
In my kantoor word die deur op knip gedruk en René
trek my teen haar vas. Haar lippe kom dadelik op myne neer en ek kan voel hoe
honger sy na my is. “Ek mis jou verskriklik,” sê sy tussen die soenery deur.
“Ek dink elke oomblik aan jou, wil jou lyf weer onder my hande voel. O Nina, ek
kan nie sonder jou nie.” Sy gee my weer ’n hartstogtelike soen en los my soos
’n warm patat toe my kantoordeur oop swaai. René groet my met ’n wuif van haar
hand en verdwyn uit my kantoor.
Isak kom
binne gestap en hy gluur my aan. “Jy speel met vuur Nina. As dit nou haar man
was wat hier ingekom het? Hy sou jou onder jou gat geskop het, erger as wat ek
sy BMW se gat gestamp het.”
“Ek weet
Isak, maar ek is lief vir haar.”
“Sorry
Nina, maar dis bullshit, jy’s net lus vir haar.”
“Isak! Het
jy nie werk om te doen nie!” Vervies ek my vir hom omdat hy so blatant is.
Vrydagmiddag, stiptelik om half vyf lewer ek en Isak
die ruikers by Hannes se werk af. Gwyneth plaas hulle op die klaar gedekte
tafels en teen sesuur is ons klaar.
Ons laai
die lee kratte by die winkel af en elkeen van ons kies koers huiswaarts.
Uitgeput
sak ek op die rusbank neer. Ons werk al van sewe uur die oggend af om betyds
klaar te wees. Dit was ’n groot bestelling en het beslis die besigheid ’n
hupstoot gegee. Ek behoort nou nog twee mense te kan aanstel. Die werk word nou
te veel vir ons drie en Isak kan ook nie meer al die aflewerings behartig nie.
Tien uur Saterdagoggend lui my foon. My moed sak
sommer in my skoene. Dis Hannes, ek het nog sy nommer van die ongeluk af op my
foon. Wat sou hy tog fout gevind het met die ruikers van gisteraand?
Huiwerig
antwoord ek en sug van verligting toe ek René se stem hoor.
“Ek wil
jou ’n baie groot guns vra, teen vergoeding natuurlik.” Sy rig vlugtig haar
versoek aan my en noem weer dat ek vergoed sal word vir die moeite.
“Sjoe, ek
het nie meer veel blomme oor in die winkel na gister se rangskikkings nie. Dalk
is daar nog iets op die mark?”
“Dankie,
Nina. Jy’s ’n skat.”
Ek aarsel
’n oomblik. “Gaan ek jou môre te sien kry as ek die ruikers kom aflewer?”
René lag
kliphard in my oor. “Hoekom dink jy het ek jou gekry om die ruikers te maak?”
Ek pluk gou ’n sweetpak aan en sit af blomme mark
toe. Terwyl ek die blomme bekyk bel ek gou vir Gerty. Die bestelling is nie te
groot nie ons twee behoort reg te kom.
Gerty is
gewillig om te help, sy is ook alleen by die huis. Haar man, Piet, moes
inderhaas gaan werk, iemand het weer nie opgedaag nie.
Ek het net
met die eerste ruiker begin toe Gerty daar opdaag. “Nou wat se krisis is dit
nou?”
“René het
my die guns gevra. Een van haar vriende het ’n doop môre oggend. Die bloemiste
wat die ruikers moes doen het op die nippertjie kop uitgetrek. Sy is nog fort
met hulle deposito ook.”
“Jy en
daai vrou, julle gaan nog scrap by haar man optel. Jy sal ook enige iets vir
haar doen nè?”
Ek glimlag
en knik my kop. “Ek’t lief geword vir haar Gerty.”
Sy sê niks
verder nie. Kom staan net voor my en gee my ’n stywe druk.
Soos belowe, kry ek vir René te sien. Sy lyk
asemrowend in ’n oranje en swart broekpak. Haar silwergrys hare blink in die son
en ek sukkel om my oë van haar af weg te skeur.
Na sy my
en Gerty gehelp het om die ruikers die kerk in te dra, wink sy my nader. René
beduie ek moet haar volg.
Daar staan
’n kar onder ’n half toegeboude afdak aan die agterkant van die kerk. Sy
drafstap na die kar toe en ek volg haar.
Skaars in
die kar gryp sy my vas en soen my met oorgawe.
“René! As
iemand ons hier sien.”
“Ek moes
net. Weet jy hoe mis ek jou?” Sy sit haar hand op my been. “Nina, dankie dat jy
gehelp het.” Haar hees stem vol deernis. Sy hou ’n tjek na my uit.
Ek snak na
my asem. “Nee, dis hopeloos te veel!”
Sy vat my
hand in hare. “Ek het mos belowe jy sal vergoed word vir jou moeite.” Sy gee my
’n vinnige soen en spring uit die kar.
Ek klim
uit en kyk haar agterna.
“En waar was jy die hele tyd?” vra Gerty toe ek in
my bakkie klim.
“Moenie
dom vra vrae nie.” Ek stop eers by die kitsbank voor ek terug ry blommewinkel
toe. “Hier.” sê ek en druk R500 in Gerty se hand. “Dis jou oortyd en omdat jy
gewillig was om my te help.”
“Nee, man
Nina. Die oortyd kry ek mos eers met payday.”
“Ag, hemel
Gerty! Vat dit dan as ’n vroeë Krismis box. Vat net die blerrie geld!”
Trane loop
oor haar wange. “Weet jy hoe het ek hierdie geld nodig. Dankie, Nina.” Sy gee
my weer ’n stywe druk soos gister. “Daai vrou beter jou waardeer. Sy’t ’n engel
gekry vir ’n girlfriend.”
Besigheid stroom nou in en ek moes nog drie mense
aanstel, twee om te help met die blomme en ’n drywer. René het al haar vername
vriende van my blommewinkel vertel en nou kan ek amper nie voor bly met verkope
nie. Die stoor yskas begin te klein word vir al die voorraad blomme en klaar
gemaakte ruikers. Ek sal moet kyk na ’n groter winkel en ek weet nie of my
finansies dit nou al gaan toelaat nie.
Maandagmiddag, halfuur voor toemaaktyd, reël ek
vergadering met almal. My kantoor is te klein om almal te huisves en ek laat
hulle sommer net daar staan waar hulle besig is met die blomme. Die klomp lyk
bekommerd en kyk grootoog na mekaar.
“Ek sal ’n
groter winkel moet kry,” verwittig ek hulle van my planne en soos een mens stem
hulle saam. “Daar is ’n plek wat ek in gedagte het, dis nie te duur nie, maar
dis nie op ’n busroete nie.”
Dit gons,
soos hulle praat onder mekaar. “Nina, dis net ek en Gerty wat met ons eie karre
ry, al die ander ry bus,” sê Gwyneth en almal beaam dit en dit gons weer.
Ek hou my
hande omhoog en maak hulle stil. “Ek gaan vêrder uitkyk. Ook sal ek sovêr ek
kan, probeer om julle te akkommodeer met vervoer. Ek weet van ’n perfekte plek,
maar dis te duur en kan dit nie nou bekostig nie.”
Isak steek
sy hand op en ek gee hom ’n spreekbeurt. “Wat van jou ryk girlfriend Nina? Sy kan
’n bus koop, dan kan jy mos op enige plek die nuwe winkel kry.”
Almal beaam
wat hy kwytgeraak het.
“Julle is
laf! Dink julle nou wragtig dat ek vir René gaan vra om vir my ’n bus te koop
om julle mee rond te karwei?”
“Nee,
Mies. Jy gaan jou boude voor haar swaai en skimpe gooi.” Marta giggel en die
ander bars uit van die lag.
Ek voel
hoe my gesig warm word en glimlag verleë. “Marta jy’s lekker verspot. Is dit
wat jy met Isak by die huis doen?” Kry ek haar terug en die keer is dit Marta
wat bloos. Die ander lag te lekker toe hulle dit gewaar.
“Kom julle
stuitige klomp, laat ons huis toe gaan.”
Ek sluit die winkel en stap kar toe. Ek wip soos ek
skrik toe iemand my aan my skouer vat. “René!” Ek omhels haar. “Dis ’n
verrassing! Bring jy vir my nog werk?”
“Nee, iets
beters. My self! Hannes is vir drie dae Kaap toe en nou het ons weer ’n
geleentheid om die paar daggies by mekaar te wees.”
Ek gil en
giggel soos ’n skoolmeisie.
Van pure
opgewondenheid, sukkel ek om my kar aan die gang te kry en laat die enjin twee
keer stol. René volg my huis toe en telkens loer ek in die truspieël net om
seker te maak dat sy wel daar is en ek nie droom nie.
Skaars in die huis gryp sy my vas en soen my met
soveel oorgawe. Ek probeer haar keer. “Wil jy nie eers iets te ete hê nie?”
“Ja . . .
vir jou!”
Sy trek my
kamer toe en begin my van my klere stroop. René gooi my op die bed en vinnig
pluk sy haar klere ok uit. Sy val langs my op die bed neer en my hande is
dadelik op haar lyf. Vir ’n oomblik raak ek stil. Ek het al amper vergeet hoe
mooi groot borste sy het. My hande vou om hulle. My vingerpunte streel saggies
op en oor hulle.
Ons word
klei inmekaar se hande. Alle drange en emosies wat vier maande opgekrop het
word ontlaai.
Vroeg Dinsdagoggend is ek wakker en loer na waar
René langs my lê en slaap. Ek staan op en gaan stort. Die louwarm water spoel
oor my. My hande omhoog teen die muur en met my oë toe, onthou ek gisteraand.
Ek het nie
die stort deur hoor oopgaan nie. Sy druk haar self teen my rug vas en omvou my.
Glimlaggend draai ek in haar omhelsing om. Soen haar en sê dankie. Sy kyk my
fronsend aan.
“Dankie,
vir gisteraand. Dankie, dat my besigheid so floreer, dat jy al jou vriende en
kennisse na my toe verwys.”
Sy soen my met oorgawe. Haar hande begin weer
dwalend soek oor my lyf en ek keer haar vinnig.
“Ek moet
klaarmaak Liefste. Die afgelope vier, vyf maande is die winkel baie besig en ek
moet sewe uur al begin om alles betyds klaar te kry.”
Die laaste bestellings is uit en ek wag vir Marcel
en Isak om terug te keer. Half sewe keer die twee terug en ek stap hulle
tegemoet. “Sjoe waar was julle die hele tyd?”
“Sorry
Nina, maar ons het die verkeerde adres gehad. Eers na ons als afgelaai het, sê
die dom donners dat hulle niks bestel het nie.”
“Toemaar
Isak dis nou verby. Is die karre in die garage, gesluit en alarms aan?”
Al twee knik en uiteindelik kan ons huis toe gaan.
Ek spring
in my kar en probeer weer om René in die hande te kry, maar die foon lui net en
dan kom die stempos aan.
Die voordeur is al weer nie gesluit nie. “René jy
sal moet leer om die voordeur gesluit te hou!” sê ek toe ek binne stap. Skielik
is daar ’n hand oor my mond en ek hoor hoe word die voordeur gesluit.
Die persoon
met die swart leer handskoene hou my mond so styf toe dat ek nie kan skree nie.
Ek word in
die rigting van my kamer forseer. Daar’s bloed oral teen die gang muur en toe
gewaar ek eers die bloed streep op die vloer. Nee, nie dit nie, gil dit hier in
my binneste. René is dood en nou is dit my beurt. Ek bid soos nog nooit tevore.
Laat hulle my net doodmaak, ek sal nie ’n verkragting oorleef nie.
Die persoon skop die kamerdeur oop. René sit op die
onopgemaakte bed. Haar kop in haar hande en bloed syfer deur haar vingers. Sy
word terug op die bed gedruk toe sy my sien en wou opstaan. “Is jy okei Nina?”
Ek knik my
kop met moeite en word ru op die bed gegooi. “René is jy okei?” kry ek ’n rou
gil uit. Ek trek ’n sloop van een van die kussings af en hou dit teen die wond
op haar kop. Duisende vrae hardloop deur my gedagtes. “Wat het gebeur?”
fluister ek.
“Shut up!”
Skree een van die twee mans. Hulle het musse oor hulle koppe, ons sal hulle nie
eers aan die polisie kan beskryf nie.
René is
bleek en sy kla oor verskriklike hoofpyn. “Ek het gedog dis jy wat klop na vyf
. . . toe oorval hulle my.”
Die mans
vermaan ons weer om stil te bly. Daar is ’n klop aan die kamerdeur en dit word
op ’n skrefie oopgemaak. Een van die mans maak die deur oop en stap uit die
kamer. Daar’s ’n fluistering, ek probeer luister. Al wat ek kan hoor is dat die
een man woedend is oor iets.
René se man storm die kamer binne en pyl op haar af.
My mond hang oop, want hoe weet hy waar ek bly.
“Liefling!
Is jy okei? Hy vat die sloop oor haar gapende wond weg. “Jy sal moet steke kry.
Liefling, ek’s jammer, maar ek het nie bedoel dat hulle jou moet seermaak nie.”
René lig
haar kop op en soveel haat het ek nog nooit in iemand se oë gesien nie. “Hannes
Bornmann! Jou bliksem!”
Hy koets
net betyds voor sy vrou se vuishou weg.
“Kyk hoe
lyk my kop. Al die pyn en lyding en vir wat?” René is buite haar self.
“Wag so
bietjie René, ek is die lydende party hier,” sê hy met ’n lag in sy stem.
Hannes haal foto’s uit ’n koevert en gooi dit na ons. “Ek het geweet dis net ’n
kwessie van tyd voor ek julle twee sou uitvang!”
“En toe
lieg jy deur te sê jy gaan Kaap toe!”
“Dit het
gewerk, het dit nie? Die lus vir hierdie lesbeen het jou so oorval, dat jy jou
self nie eers vir drie dae intoom kon hou nie!”
Hannes loop of en af in die kamer, asof hy dink wat
om volgende te doen.
“Wat wil
jy hê Hannes!” René lig nie haar kop op nie, sy het al te veel bloed verloor en
het nie meer veel veggees oor nie.
“’n
Egskeiding my Liefling!”
“Goed,
laat ons dan nou asseblief met rus. My kop . . . ek kan nie meer nie.” smeek
René.
“O nee! So
maklik gaan dit nie wees nie. Jy sal die landgoed, die besigheid en jou
bankbalans eers aan my oorteken voor jy van my ontslae gaan wees.”
“Jy’s van
lootjies getik. Dis my pa se besigheid, my pa se geld wat ek geërf het en my pa
se landgoed!”
Hannes
kniel voor René en druk sy vinger in haar gesig. “My liewe vrou . . . jy gaan
kaalgat hier uitstap.”
“Oor my
dooie liggaam!”
“Dit kan
gereël word,” sê hy en pluk ’n pistool uit sy sak. Die loop van die pistool
word teen René se kop gedruk. “Ons vat ’n paar goedjies uit die huis. Polisie
kom hier aan en julle tweetjies is net nog ’n statistiek op Suid-Afrika se
misdaad lys. Mooi uitgewerk nè?”
“Trek die
sneller,” sê René en bly ’n oomblik stil. “Trek die sneller Hannes!”
Hy staan
haar en uitlag. “Jy’s baie dapper, my vrou?”
Sy lig
haar kop met moeite op. “Ek het ’n moerse surprise vir jou as jy daai sneller
trek.”
Hannes
laat sak sy hand en ek sug van verligting.
“Wat
bedoel jy?” Hy stap weer tot by haar, gryp haar aan die skouers en skud haar.
“Jy gaan nie ’n sent kry as jy my doodmaak
nie.”
Hannes
lag. “Ek weet, dink jy ek’s dom? Hy gaan dit vir my doen,” sê hy en beduie na
een van sy handlangers. Hy gee haar ’n hou teen die kop met die agterkant van
die pistool en druk dit in sy handlanger se hand. “Skiet haar.”
René beur regop. Die bloed stroom uit haar kopwond,
in haar oë en sy sukkel om te sien. “Hannes, jy is nie meer my begunstigde
nie,” sê sy en begin histeries lag.
Hy storm
op haar af en gryp haar aan die keel.
My
kamerdeur swaai oop en die polisie storm in. Ek sluit my oë en stuur ’n
skietgebedjie op.
My selfoon
was in my sak en niemand het eers weer van my notisie geneem nie. Gerty is op
my speeddail en gelukkig het sy kop gehou toe sy die gesprek hoor. Sy het na
die naaste polisiekantoor toe gery, waar sy hulle laat luister het.
Die polisie het Hannes en sy handlangers in boeie
daar uit. René se kop is verbind en sy word op die ambulans trollie uitgestoot.
Hannes
steek vas toe sy verby hom gestoot word. “Wie is nou die begunstigde René?”
Sy glimlag
vir hom. “Die een wie se huis jy so vol bloed bemors het, jou vark.”
Hy begin
gil en skree. “Nee, jy kan dit nie doen nie!”
Een van
die konstabels gryp hom hardhandig en boender hom in die vangwa.
Verskrik
loer ek by die sitkamer venster uit toe ek die gille buite hoor.
Gerty vat
my aan die skouer en laat my op die rusbank lê. “Rus, jy was deur ’n helse
ordeal.”
’n Mislikheid stoot in my op en ek vlieg regop. Die
reuk van bloed wat nat geword het hang in die lug. Ek vlieg op en kry Gerty op
haar knieë waar sy sukkel om die bloed uit die matte te was. “Nee! Daai matte
word uitgegooi, jy gaan hulle beslis nie was nie.”
Sy kom regop
en knik haar kop.
Ek kyk
rond, sy het reeds die mure en vloer gewas. “Dankie, ek weet nie wat sou ek
sonder jou gedoen het nie. Jy’t ons lewens gered en nou sloof jy jou hier af
ook.”
Saam rol
ons die matte in die kamer op en gaan gooi dit langs die vullisblik op die
sypaadjie. Gerty gooi vir my ietsie sterks in voor ons hospitaal toe ry.
Ons sit in die wagkamer en wag om René te sien. Die
dokter het my kom meedeel dat sy dringend in ICU opgeneem is. Haar bloeddruk
het te veel gedaal omdat sy so baie bloed verloor het. Hulle is besig om vir
haar ’n bloedoortapping te gee. Ek sal haar eers môre kan sien.
“Kan ek
haar nie net vir ’n rukkie sien nie dokter? Ek moet haar sien.”
Gerty trek
my aan die arm daar weg en vat my terug kar toe. “Jy gaan haar môre sien. Julle
al twee moet nou rus kry.”
Tien uur die volgende oggend is ek by die hospitaal.
Dis besoektyd en hulle laat my toe om René te gaan sien.
Sy lyk so
weerloos in die wit hospitaalbed. Die helfte van haar kop is verbind en net
haar een oog steek uit. Sy steek haar hand uit toe sy my gewaar.
“Is jy
okei Liefste?”
“Ek moet
dit vir jou vra, jy’s die een in die hospitaalbed.”
Sy tuit
haar lippe en wys dat ek haar moet soen. Tevrede lê sy terug teen die kussings
na ek haar gesoen het.
Die
halfuur is vinnig om, besoektyd is verby en ek mag nie langer bly nie. Ek groet
haar en belowe dat ek volgende besoektyd weer sal kom kuier.
Die lamppale is vol koerant opskrifte oor
“Biljoenêrs dogter in liefdes driehoek.” By die winkel storm al my werkers op
my af. Almal praat gelyk en wil net weet of ek okei is. Ek stel hulle gerus en
stap na my kantoor.
Isak kom
binne gestap en gooi ’n koerant voor my neer. “Wat het ek jou gesê Nina?”
Ek sluit
my oë en beduie dat hy moet loop.
“Ninatjie,
ek’s bly jy’s okei. Darem is dit nie jy wat soos daai BMW se gat lyk nie.” Hy
draai om en trek die deur op knip.
Ek
glimlag. Ja. Ek’s bly ek het nie ook ’n hou oor my kop gekry nie.
Drie dae later word René ontslaan. Die verbande om
haar kop is met pleister vervang en sy lyk sommer klaar beter.
Ek’s in die
kombuis besig om kos te maak toe René my sitkamer toe roep. “Kom ons vlug
Amerika toe vir ’n ruk, net tot die stof gaan lê het.”
“Is jy nou
ernstig René, wat van Just Flowers? Nee, ek kan nie.”
“Stel ’n
bestuurder aan Nina.” Sy sien dat ek aarsel. “Wat van Isak, hy werk mos al lank
by jou?”
Maandagoggend toe almal by die winkel is, roep ek ’n
vergadering byeen. Ek vertel hulle wat ek wil doen en vra Isak om my winkel te
bestuur.
“Nee, nee,
nee! Ek bestuur die bakkie en dis al.”
Ek kyk na
Gerty en voor ek nog kan vra, skud sy reeds haar kop.
“Mies?”
Marta steek haar hand op. “Ek sal Mies, as Mies my gaan vertrou?”
“Natuurlik
vertrou ek jou Marta. Is jy seker dat jy dit wil doen? Onthou, jy gaan nou jou
man se baas wees.”
“Ek wil
dit doen. Ek kry dit anyway nie reg om baas by die huis te wees nie, nou kan ek
hom hier in die bek ruk. Sommer vir goed wat by die huis ook verkeerd gegaan
het,” sê sy en gluur na Isak.
Hy klap sy
tong en kyk ander pad.
Marta se
gesiggie helder sommer op toe sy hoor dat sy ’n salarisverhoging gaan kry,
asook vervoer toelaag.
René wys my al die wonderlike plekke in New York,
Los Angeles, San Francisco, om maar net ’n paar plekke te noem. Ons is al ’n
maand in Amerika en die laaste aand voor ons vlug terug Suid-Afrika toe, kuier
ons rustig in die hotel kamer.
“Wanneer
ons terug is, gaan ek my besigheid verkoop.”
“Hoekom,
dit was dan jou pa s’n gewees? sê ek geskok.
“Nina, ek
het nog nooit sin vir die besigheid gehad nie, daarom dat ek Hannes aangestel
het om dit vir my te bestuur. Ek het maar net ingegaan met groot vergaderings
en wanneer daar tjeks geteken moes word.”
Ek kan aan
René se stemtoon hoor dat sy klaar besluit het en ek gaan haar nie kan ompraat
nie. “En dan, wat gaan jy dan doen?”
Sy vat my
hande in hare. “Dan my Liefste, gaan ek die geld in jou blommewinkel belê en as
jou silent partner optree.”
My mond
val oop. “Is jy ernstig hieroor?”
“Ek was
nog nooit so ernstig oor iets soos oor hierdie aanbod nie Nina.”
Ek omhels
haar en soen haar. “Ek kan nie glo dit gebeur met my nie. Nou kan ek my winkel
uitbrei, groter perseel kry . . .”
Sy laat my
nie my sin voltooi nie. “Nou kom ons skud blad soos goeie vennote sou doen,” sê
sy en steek haar hand uit.
“Dink jy
nie daar is iets beters as bladskud om die transaksie mee te beklink nie?” Ek
vat haar hand en lei haar na die slaapkamer.
“Lyk my ek
sal hare op my tande moet hê met my nuwe vennoot, sy gaan my net verlei.” Sy
gryp my vas en gooi my op die bed. “Sy kan my verlei, maar ek gaan vat wat ek
wil hê en wat myne is.”
Laggend
val René langs my op die bed neer en kyk met soveel liefde in haar oë na my,
voor sy my vir die soveelste keer hare maak.
Daar lê ’n moeilike tyd vir René voor. Sy moet hof
toe om teen haar man te gaan getuig, haar skeisaak is klaar hangend gemaak en
sy moet haar pa se besigheid in die mark kry.
Die
verkoop van haar pa se besigheid gaan vinniger as wat sy verwag het. Nadat sy
die geld ontvang het, het sy dadelik al die fondse in Just Flowers se rekening
gestort. Sy’t ’n kontrak laat opstel dat ek met die fondse kan maak wat ek wil,
solank dit net tot die voordeel van die blommewinkel is. Vergaderings sal sy
bywoon, net om op hoogte van haar kapitaal te wees.
Die aand aan die etenstafel begin ons eerste stryery
oor die blomme winkel.
“Ek het
nie ’n boekhouer nodig nie Liefling, ek doen my boeke al jare self.”
“Jou
winkel is besig om uit te brei, jy’s die CEO en CEO’s doen nie hulle boeke self
nie. Stel ’n boekhouer aan.”
Sy kyk my
met haar groot donker oë aan, dat ek dadelik instem.
“En dis ek
wat hom gaan betaal, jy hoef nie bekommer te wees om nog die winkel se kapitaal
daarvoor ook te gebruik nie.” Haar donker oë versag en sy vat my hand. “Nina my
skat, jy moet leer om te delegeer.”
Ek knik en
besef dat ek nie meer alles alleen sal kan behartig nie.
René storm my kantoor binne. “Ek het die perfekte
plek gekry om jou blommewinkel heen te skuif!” Sy gryp my hand en trek my by
die deur uit.
Ons ry
vier blokke vanwaar die winkel nou is en klim uit. Ek trek my asem hard in. Sy
gryp weer my hand en maak die deur oop.
“Daar is
twee verdiepings. Die kantore, kombuis en badkamers is bo. Onder is die winkel,
werkarea en yskas.”
Ek kyk
rond maar sien nie ’n yskas nie. “Hier’s nie ’n yskas nie my Engel, ons sal dit
nie kan vat nie.”
Sy beduie
na agter. “Daar gaan die yskas staan.”
“Sjoe! Ja,
ek hou van die plek, dis ideaal.”
“Ek het
geweet jy sou daarvan hou! Ek het dit klaar gekoop.”
“Is jy nou
laf? Hoe sou jy jou geld teruggekry het as ek nie daarvan gehou het nie?” Vies
stap ek uit die gebou terug kar toe.
“Die yskas sal oor twee weke reg wees en dan
sal hulle dit vir ons kom installeer,” lig sy my vêrder in toe sy agter die
stuurwiel inskuif.
Ek skud
net my kop en gee ’n snork lag. “Jy’t nou wraggies alles alleen gedoen. Mag ek
darem weet hoe die yskas lyk voor hy ingesit word?”
René rol
haar oë vir my. “Jy is besig by jou winkel, jy kan nie nog dit ook doen nie.” Sy bly ’n
oomblik stil. “As jy wil, sal ek jou gaan wys hoe die yskas lyk.”
“Toemaar,
ek weet dit sal perfek wees.” Ek laat staan my nukkerigheid. Ek het net skielik
besef dat ek hier met ’n groot sakevrou te doen het en dat sy beslis weet wat
sy doen.
Marta bring vir my tee en ons sit saam en tee drink
en gesels oor al die nuwe verwikkelinge. “Hemel Marta, kan jy glo ons trek oor
’n maand in die nuwe gebou in?”
Sy skud
ook net haar kop. “Daai vrou sorg mooi vir jou, ek’s bly.”
“Dis omdat
sy lief is vir my. Isak was verkeerd oor haar, oor my en haar. Die vermetelheid
wat hy gehad het deur vir my te sê ek is net lus vir haar, g’n lief vir haar
nie.” Ek vervies my weer vir sy woorde, maar kan nie help om saam te lag toe
Marta uitbars van die lag nie.
“Ja, dis my
Isak daai, hy worry mos nie wat hy sê en vir wie hy dit sê nie.”
Die maand vlieg om. Ons het besluit om oor ’n naweek
te trek, want dis wanneer ek die minimum blomme in my yskas oor het. Ek wil nie
met vars blomme trek nie, dit gee hulle net ’n knou en dan is dit geld in die
water gegooi.
Die gebou
is leeg. Ek is alleen daar toe René daar instap. My oë nat van die trane,
probeer ek afskeid neem. Sy druk my teen haar vas. “Hier het ek my lewe begin,”
snik ek in haar nek.
“En jy was
suksesvol. Nou moet jy aanbeweeg na groter, na meer en na beter. Dan natuurlik,
saam met my.” Sy soen my op die wang en los my alleen.
Vir oulaas
sluit ek Just Flowers se deur toe. My skouers ruk. Ek sluit my oë en staan met
my kop teen die deur.
Ek doen dertien aanstelling in die maand wat volg,
waarvan twee drywers is. Marta is natuurlik in haar noppies dat sy nou haar eie
kantoor het en was skoon aangedaan toe sy haar eie meubels kon gaan uitsoek
het.
By die
nuwe gebou is daar nou ’n telefoniste wat ook telefoniese bestelling vat en ’n
konsultant wat die kliënte kan help besluit om die regte blomme of
rangskikkings te kies. Dit voel nou amper of ek nie meer werk nie.
René het
’n bus gekoop om die werkers op sekere punte op en af te laai vir werk. Sy het
die bus laat pienk verf, met yslike groot blomme op en Just Flowers weerskante
op laat verf. Isak se lip hang elke oggend op die grond wanneer hy
aan diens kom, omdat hy met die “verspotte” pienk bus moet ry.
Daar is
ook twee nuwe aflewerings trokke gekoop, toegerus met yskaste binne-in. Nou
lewer ons blomme varser en vinniger af.
“’n Mooi blom vir die mooiste vrou in die wêreld.”
Ek kyk op
toe ek René hoor praat. Sy hou ’n bloedrooi roos na my toe uit. Vraend kyk ek
na haar toe ek die roos vat.
“Van nou
af is ek René Lategan.”
Ek spring
uit my stoel en omhels haar. “Aangename kennis juffrou Lategan,” sê ek en soen
haar. “Hoekom het jy my nie gesê dis vandag nie, dan kon ek saam met jou hof
toe gegaan het?”
“Ag, dis
nou oor en verby. Die grootste kopseer lê nog voor, Hannes se hofsaak. Dan sal
ek jou graag daar wil hê vir ondersteuning.”
Ek het by René in haar herehuis ingetrek en verhuur
my huis aan Isak en Marta. Ook net op die regte tyd, want die hofsaak knaag aan
haar.
Snags lê
sy en rondrol in die bed. Saans raak sy sommer op die bank aan die slaap, van
geestelike uitputting. Baie nagte word ek wakker, dan sit sy in haar
studeerkamer.
Dis ’n moordende hofsaak. Asof hulle al die skuld op
René wil pak. Hulle peper haar met vra van alle kante af. Die saak sloer nou al
amper ’n jaar lank. Ons albei is net baie bly dat Hannes en sy handlangers nie
borgtog gekry het nie, hulle sou ons verseker kom terroriseer het.
René is weer nie langs my in die bed nie toe ek
laatnag wakker skrik nie. Ek stap met die trappe af onder toe. Die studeerkamer
deur is halfoop en ek loer om die deur. Kop onderstebo sit sy agter die
lessenaar. Sy kyk op toe ek met haar praat. Floutjies glimlag sy en stel my
gerus, dat sy okei is.
“Jy lyk
nie okei nie. Praat met my.”
Sy trek
haar asem diep in. “Hannes word Vrydag gevonnis. Ek was dertig jaar met hom
getroud. Wie sou kon dink dat my huwelik met hom so sou ontaard en so vieslik
sou eindig?”
Intussen
het ek om die lessenaar geloop en my arms om haar gaan sit.
“’n Mens
sou dink jy ken iemand na dertig jaar.” Skielik weergalm dit soos sy lag. “Ja,
hy dink dit seker van my ook. Die vrou met wie hy dertig jaar getroud was, los
hom vir ’n vrou.”
Ek maak my
arms om haar nek los en gaan sit op die stoel oorkant haar. “Dis alles my
skuld. As dit nie vir my was nie, het jy nog ’n huwelik gehad.” Ek voel lus om
te huil en verberg my kop in my hande.
“Nee Nina!
Niks hiervan is jou skuld nie. Ek en Hannes het lankal nie meer ’n huwelik
gehad nie. Ons het net saamgebly vir die gerief daarvan.” Sy staan op, kom hurk
voor my en vat my hande voor my gesig weg. “Moet nooit weer sê of enigsins dink
dat dit jou skuld is nie. Ek het jou lief en sal weer deur alles gaan as dit
beteken dat ek weer jou liefde sal wen.” Haar hees stem is sag en vol deernis.
Vrydagoggend vergesel ek René hof toe.
“Nina, wat
gaan ek maak as hy loskom, deur ’n fout of iets kleins wat ek moes of nie moes
gesê het terwyl ek getuienis gelewer het nie?”
Die regter
lewer sy uitspraak en ek sien die verligting op René se gesig. Hannes en sy
handlangers gaan lank agter tralies sit. Sy gryp my hand en druk dit styf vas,
sy was verniet bekommerd.
Ons is
skaars buite die hofsaal, of sy gryp my vas en soen my vurig in aanskouing van
elke joernalis en fotograaf.
Sy gryp my
hand vas en saam vlug ons van die flitsende kameras, joernaliste en
verslaggewers. “Laat hulle skryf wat hulle wil!” roep sy uit terwyl ons die
trappe afhardloop kar toe.
“Die hoofstuk in my lewe is nou afgesluit.” Sy vat
my hande in hare en soen hulle.
Ek glimlag
en knik vir haar.
Sy los my
hande en vroetel in haar broeksak. Sy haal ’n diamant verloofring uit haar sak,
vat my linkerhand en steek dit in my ringvinger.
Ek is
sprakeloos en voor ek iets kon sê, spring sy uit die kar, draf om na my kant
toe en pluk die deur oop.
René sak
langs die kar op haar knie af en vra my om met haar te trou. “Begin die nuwe
hoofstuk sonder ’n einde, saam met my?”
Ek knik en
bars in trane uit, trane van geluk.
baie goed!!!
ReplyDelete